Тыа сирэ- сайдыы биһигэ. Үрдьүҥэхтээххэ саҥа оҕо саада дьэндэйдэ.

         Хара нэһилиэгин баһылыга Дария Назарова улуус уонна рөспублика салалталарын көмөлөрүнэн «Тыа сирин-уотун тирэхтээхтик сайыннарыы” федеральнай программаҕа киирсэри ситиһэн 90 миэстэлээх таас икки этээстээх саҥа оҕо саада үлэҕэ киирдэ.Үөрүүлээх күн Хара нэһилиэгин дьоно-сэргэтэ нэһилиэк историятын кэрэһиттэрэ буолан тоҕуоруһа муһуннулар. Алгысчыт Виталий Очиров сахалыы сиэринэн үрдүк айыыларга айах тутан күндүлээтэ, алгыс сиэрин-туомун ыытта. “Арктика-строй” ХЭТ генеральнай дириэктэрэ Петр Никифоров саҥа уһуйаан символическай күлүүһүн улуус үөрэҕин уаравлениетын начальнигар Ирина Черкашинаҕа туттарда. СР правительствотын бэрэссэдээтэлин бастакы солбуйааччыта Алексей Стручков, СР тыа хаһаайстыбатын уонна ас-үөл политикатын миниистирэ Александр Атласов, улуус баһылыга Николай Старостин, Хара нэһилиэгин баһылыга Дария Назарова  “Кэрэчээн” оҕо уһуйаанын аалай кыһыл лиэнтэтин кырыйан саҥа уһуйааны арыйан силигин ситэрэн, олохтоохторго үөрүүлээх түгэни бэлэхтээтилэр. Саҥа уһуйааҥҥа кырачааннар кэлбит ыалдьыттарга үөрэ-көтө ыллаан-туойан, бэйэлэрин махталларын биллэрдилэр.

 

          Зоя Герасимова.